Како си помина Ангела во Лисабон, Португалија?

Веќе поминаа неполни два месеци од мојата посета на Лисабон, а јас се’ уште сум под импресии од ова несекојдневно и незаборавно искуство кое ми го направи изминатово лето поубаво од сите претходни. Не можам да опишам колку бев радосна кога со мала доза на неверување прочитав дека сум  примена на двонеделниот BEST курс. Па, еве ги накратко моите впечатоци.

Во Лисабон пристигнав доцна навечер, а на аеродромот ме пречека една од организаторите на курсот и директно ме однесе на забавата за добредојде. За распакување и одмор не стануваше збор, време беше за забава и дружење до раните утрински часови. На забавата веќе беa дојдени сите организатори на курсот и останатите учесници кои претходно пристигнале, па таа вечер се запознав со сите тие прекрасни луѓе со кои поминав две незаборавни недели и со кои се’ уште контактираме.

Следниот ден започна со напорно, интензивно темпо кое не’ следеше за време на целиот престој , но без кое немаше да видиме и доживееме толку многу работи , кои ни даваа чувство како да сме таму многу подолго. Станување во 7:30, после  час-два сон, потоа појадок, предавања и вежби,  ручек, прошетки и екскурзии, вечера, додека остатокот од денот беше резервиран за забава.

Темата на курсот беше “Do it yourself engineering and smart cities”. Беа одржани  предавања од професори од нивниот универзитет, како и од претставници на успешни компании. Имавме и работилници каде можевме да го примениме она што сме го научиле, а на крај ги презентиравме нашите проекти.

Покрај академскиот дел од курсот, имавме доста време за разгледување на градот и посета на сите позначајни знаменитости. Бев воодушевена  од се’  она што Лисабон може да го понуди како туристичко место. Честопати знаевме да се пошегуваме дека сме во Рио Де Жанеиро, гледајќи ја португалската верзија на статуата на Исус или пак, дека се наоѓаме во Сан Франциско, сликајќи се во позадина со лисабонскиот Golden Gate.  И покрај неколкуте сличности со други градови, Лисабон плени со некој свој уникатен шарм и топлина, што не може да се сретне на друго место.  Бев воодушевена од симпатичните, тесни и стрмни улички низ кои минуваа карактеристичните жолти трамваи, од фасадите на зградите направени од мали плочки во разни дезени , како и од разиграните мозаици на тротоарите и плоштадите.  Ја посетивме кулата Белем, во чија близина имавме можност да го пробаме најпознатиот португалски десерт Pastéis de Nata, а исто така и Националната Палата, во која прошетавме низ раскошните соби на тогашното кралско семејство.

За викендот имавме екскурзија до Синтра- град со прекрасни замоци и паркови, и до Обидос – средновековно гратче, каде ја прават најдобрата Ginjinha – ликер служен во мали  шолјички направени од чоколадо. Уживавме во погледот од најзападната копнена точка на Европа, се релаксиравме на прекрасните плажи, а ни беа и организирани часови по сурфање, што малку тешко ни одеше на почеток, но беше исклучително забавно.

Вредни за спомнување се и тематските забави, кои го направија нашиот престој во Лисабон уште поинтересен. Секоја вечер имавме забави од различен карактер, надополнети со разни игри и соодветен дрес код, заради кој често личевме како да одиме на маскембал . На Интернационалната вечер, пак, имав можност да пробам традиционална храна и пијалоци од многу земји, а ме израдува и фактот што сите се воодушевија од нашиот ајвар.

Сe’ на се’ ова беа две прекрасни недели во еден преубав град, исполнети со многу дружење, смеа и  забава. Можност да се запознаам и спријателам со триесетина студенти од различни европски држави и да научам нешто повеќе околу нивната култура и начин на живот. Незаборавно искуство кое вреди да се доживее и  кое на сите им го посакувам.

Ангела Јосифовска