Мартина Папалиска и Евгенија Цветановска - Мотивациски викенд

1. Каде беше одржан мотивацискиот викенд и каква беше атмосферата таму?

- Мотивацискиот викенд беше одржан од 11-13 декември во планинарскиот дом Вртешка, на наша огромна среќа викенд со преубаво, сончево време. Ова беше нашиот прв мотивациски викенд откако сме членови во БЕСТ и само со еден збор да кажеме дека сме презадоволни не може доволно да го долови чувството, со оглед на тоа што сепак сè уште си ги собираме импресиите од тие 3 дена. Запознавање на нови пријатели, зближување со оние кои веќе ги познаваш, забава каква што со сигурност не може да се најде на друго место, интересни муабети додека се буткаме за топло место пред каминот и еден куп преубави спомени е она што секој од нас го доби како плус искуство од овој викенд.

2. Како изгледаше еден од деновите? 

- Денот таму ни започуваше со едно интересно будење од страна на оние кои поради некоја причина беа будни уште во 8 часот сабајле (меѓу кои и ние две :D), па веднаш потоа по доручекот следуваа team building игри, односно мали игрички со цел подобро меѓусебно да се запознаеме придружени со многу забава и смеење. Она што следуваше е всушност главниот дел од мотивацискиот викенд, а тоа се сесиите. За оваа цел беше дојден Адам, тренер од БЕСТ во Солун кој ги држеше овие сесии, со кого имавме прекрасно искуство бидејќи тој беше навистина спремен за сесиите и даде сè од себе да ги приближи до нас и притоа да ни биде интересно и постојано да имаме интеракција и активно да учествуваме во нашите сесии.
Првата сесија беше на тема BKT (Best knowledge transfer), при што имавме можност да дознаеме сè за БЕСТ како организација, почнувајќи од раните почетоци до денешната структура и начинот на функционирање.

Сесијата пак од вториот ден беше за Feedback, односно што вистински означува, какви видови има и како правилно да дадеме повратен одговор на некој кој го побарал или не го побарал тоа од нас. На крајот на вториот ден имавме и Alumni Stories, интересни приказни од алумните за нивните искуства во БЕСТ, како и многу корисни совети од прва рака. После ова имавме и мини кино, каде што го гледавме анимираниот филм Hero 6, по иницијатива на Бинаса, нашиот HR (human resources), а по завршувањето на филмот следеше и објавување на апликацијата Baymax, каде што секогаш кога таа нема да може да биде физички присутна со нас, ќе можеме да бидеме поврзани со неа, во врска со какви било проблеми кои би можеле да ги имаме (можеби и најемотивниот дел од мотивацискиот викенд).

И на крајот на секој ден, доаѓа забавата! Многу музика, танцување, забавување, повторно некои мали игри и еден куп незаборавни спомени!

 

3. Кога ќе има следен пат ваков мотивациски викенд и кој се може да се приклучи на истиот?

- Наредниот ваков мотивациски викенд ќе се оддржи кон почетокот на март и ќе биде отворен за сите членови на БЕСТ, но секако и за оние кои што би сакале да се приклучат во нашата организација. Ние нестрпливо ги броиме деновите до следниот, а вие?

 

 Повеќе фотографии може да погледнете ТУКА.

Симона Милошевиќ и Андреј Ќосевски - дел од тимот на beRICHER

1. Каков настан е beRICHER? - Работилницата be [R]aise [I]ncomes by [C]ooperating [H]onestly with [E]xternal [R]esourses е интерен настан кој се одржува еднаш годишно, па така оваа година од 21ви до 29ти ноември се оддржа токму во Скопје. 20 студенти, членови на БЕСТ од цела Европа имаа шанса да присуствуваат на сесии одржани од интернационални тренери на БЕСТ и да научат многу нешта од областа на fundraising, корисни не само за нив туку и за организацијата на интернационално ниво. Овие тренинг сесии се направени се со цел студентите да ги подобрат своите комуникациски вештини, да научат како да се однесуваат за време на состаноци, да дознаат за најкорисните трикови при телефонирањето и предизвиците од соочување со претставници на компании, како и што се крие во невербалната комуникација.

2. Како беше организиран еден ден на ваков тип на настан и каков вид на сесии точно имаше?
- Дневно настанот започнуваше со појадок, кој после тоа веднаш почнуваа сесиите за подобрување на комуникациските вештини, преговарање, и сл.  сите распределени во координација со планот за работа на тренерите. Во текот на тренингот имаше и изведба на симулации и вежби, за соочување со претставници на компании, како и за професионално однесување за време на состаноците. Покрај едукативниот дел, учесниците имаа можност да го видат нашиот град и да се запознаат со културните и историските обичаи и знаменитости на Македонија. Благодарение на спонзорите и на поддржувачите на настанот, партиципантите и тренерите вкусија дел од македонската кујна и гостопримливата атмосфера на различни локации од градот. И за крај студентите имаа шанса да ги презентираат нивните традиционални јадења и пијалоци, народни носии, песни и танци, на добро познатата Интернационална вечер



3.Која беше твојата функција и како се снајде во неа?

-Симона:  Како дел од ова издание на тренинг работилницата - beRICHER16, бев одговорна за PR и Social Media, односно одговорна за односи со јавноста и промовирање на настанот по социјалните мрежи.  Севкупниот впечаток од  самото организирање на едукативен настан од овој тип, ми овозможи мене како студент да го распознаам светот на ПР на едно друго ниво како и предизвиците кои доаѓаат со него. Работејќи во тим со прекрасни БЕСТ-овци, можеше да се осети тимскиот дух и чувство на сигурност дека имаш луѓе на коишто можеш да се потпреш за помош при организацијата на настанот, ми ја зголеми мотивацијата за работа и за превземање на поголеми предизвици во иднина.

-Андреј: Мојата функција како дел од кор-тимот за овој настан беше да се погрижам за дневните и ноќните активности на учесниците што вклучуваше дневни посети и разгледување на Скопје и посета на езерото Матка. Од друга страна за ноќните активности тие беа запознаени со ноќниот живот во нашиот главен град. Ова беше моја прва функција како дел од кор-тим во мојата скромна кариера во БЕСТ и не само што научив многу, туку и пријателствата и искуствата кои ги добив вредат многу. Учесниците беа задоволни и сигурен сум дека ќе ни дојдат дури и без некој посебен повод повторно. Како и сите други настани што ги организира нашата студентска организација и овој беше успешно реализиран па мотивирани продолжуваме и понатаму.

Повеќе фотографии може да погледнете ТУКА.

Димитар Таневски и Бинаса Дрндар - Главни организатори на OHrid JAM 2015

1. Што претставува настанот OHridJAM???

-OHrid JAM е еден вид на културна размена на интернационално ниво, помеѓу членовите на БЕСТ. Настанот се одржа од 2ри до 5ти Октомври, во хотелот Бетон покрај Охридското езеро. Најголема причина за организирање на оваа размена ни беше можноста за повторно да се видиме со другарите од другите земји, да им ги покажеме македонските знаменитости и обичаи, и секако остварувањето на нови пријателства.

2. По кој пат го организирате и колку учесници имаше?
-OHrid JAM 2015 е трет по ред настан од овој тип кој што БЕСТ Скопје го организира. Она што е убаво за ваквите настани е токму дружбата помеѓу млади луѓе од различни земји. Оваа година имавме околу 150 учесници и тоа од Португалија, Турција, Италија, Грција, Црна Гора, Хрватска, Данска, Шпанија, Србија, Шведска, Белгија, Франција, Норвешка, Русија,Романија, Украина, Словачка и Германија. 

3. Според фидбекот кој го добивте од учесниците, која им беше омилена дневна а која ноќна активност
-Омилена дневна активност им беше крстарењето со брод по Охридското езеро. Додека пак од вечерните забави, омилени им беа интернационалната вечер, на која што беа презентирани разновидни традиционални јадења и пијалоци од сите присутни земји, и забавата со флуоресцентни бои. 

4. Претставете го својот тим со кого соработувавте и на кратко опишете како ви течеше соработката?
-Ние двајца бевме главните организатори на овој настан а нашиот тим беше составен од вкупно 9 суперхерои кои што, секој со својата посебна моќ, успеа да изреализира еден прекрасен настан. Мало објаснување во врска со суперхероите. Како и самиот настан кој што беше тематски и на секој учесник му беше доделена посебна моќ, така и во самиот Кор Тим секој поединечно беше суперхерој. Енергијата и посветеността која секој Кор Тимовец ја имаше кон настанот придонесе за супер комуникација и соработка. Овој тим беше тим по дефиниција, работевме и размислувавме како едно. Одлична дружба и уште поодлична завршена работа. 

5. Која ви беше мотивацијата да бидете главни организатори на ваков настан? 
-Димитар: Член сум на BEST повеќе од две и пол години, и до сега сум учествувал на скоро сите видови настани коишто се организираат и на локално и на интернационално ниво во нашата организација. Најмногу од сите ми се допаѓаат така наречените JAM-ови, и затоа кога беше решено дека ќе организираме настан од ваков вид, решив да се пријавам за главен организатор. Најголема мотивација ми беше можноста да бидам домаќин на сите учесници, остварувањето на многу нови пријателства, и секако желбата да бидам дел од еден супер тим со чија помош направивме незаборавен настан и за нас, и за сите учесници.
-Бинаса: Моето БЕСТовско патување започна токму на настан од овој вид, па така штом беше пуштен повикот за главен организатор на ЏЕМот, не се двоумев ни секунда. На вакви настани најчесто се среќаваат стари пријатели, се стекнуваат нови, има одлична дружба и споделување на БЕСТовски приказни и искуства. Токму овие работи беа мотивацијата да се пријавам за главен организатор, за да водам и бидам дел од тим кој што ќе организира едно вакво кул случување. И сега, откако се помина, можам да кажам дека беше едно од најубавите искуства во мојот живот.

повеќе фотографии може да погледнете ТУКА.

Наташа Митева - Учесник на RM Ankara Autumn 2015

1. Што претставува RМ Анкара на кратко, кои БЕСТ локални групи беа дел од него и колку луѓе имаше вкупно?
- RМ (Regional Meeting) е настан во БЕСТ кој се случува 2 пати во годината. Оваа есен беше во Анкара, а таму можеа да се најдат делегати од локалните БЕСТ групи, тренери, делегати од департманите во БЕСТ, еден претставник од интернационалниот борд на БЕСТ и регионалниот советник. Овие регионални состаноци најчесто траат од 4-5 дена и за време на истите делегатите можат да присуствуваат на најразлични soft skills сесии, на работни групи на кои можат да ја увидат работата на департманите, но и на припреми за претстојниот генерален состанок.
Во нашиот т.н. Егејски регион се локалните БЕСТ групи: Скопје, Ниш, Подгорица, Патра, Атина, Хања, Анкара, Истанбул и Измир. Па од сите претходно набројани групи по неколку делегати + тренерите + делегати од департмани, бевме околу 50тина студенти на овој настан.

 2. Какви се' сесии имаше и која беше твоја омилена?
- Тоа беа всушност soft skills сесии, за време на кои преку многу интерактивен, интересен начин, неприметливо учиш на пример трикови за подобрување на твојот time management или како да го подобриш начинот на кој даваш feedback на луѓето кои работат со тебе (ова на пример многу ќе ми е од корист кога ќе се вработам после студиите). Споменав само две од многуте на кои присуствував, но како омилена би ја издвоила сесијата за ефективни состаноци. Сите сакаме да дојдеме на состанок и да дискутираме на одредената тема и брзо да завршиме со работата, но потоа сфаќаме дека сме заглавиле со саати затоа што не била ефективно водена дискусијата. На таа сесија сфатив дека е прелесно состанокот во организацијата да биде непродуктивен, воочив кои работи треба да се избегнуваат и научив како треба да се води еден ефективен состанок.



3. Покрај сесиите, дали имаше време да шетнеш и во Анкара?
- Мотото на овој настан е Work hard, party harder! За време на настанот бевме на сесии од 9 сабајле до 9 вечер (секако, со паузи за кафе, ручек и слично), а после вечерата имавме забави кои беа организирани само за нас. Поради тоа не бевме во можност во тие 5 дена да шетнеме во Анкара, нооо убавината во овие настани е тоа што никој не те спречува да дојдеш неколку дена порано или да си одиш неколку дена покасно, па тогаш да си се прошеташ по твој мерак. Јас бев таму 4 дена пред настанот, се изнашетав што се вика „за сите пари“! Се сретнав повторно со студенти од БЕСТ со кои сум се запознала на претходни настани, запознав една нова култура (која не е многу поразлична од нашата, но секако си има разлики), а и ми се исполни желбата да го посетам мавзолејот на Ататурк ( кое е ооогромна градба и ги магепса дури и тие кои не се љубители на историјата )! Апсолутно вреди да се посети Анкара, а уште подобро е доколку тие денови ти се изрежирани од членовите од БЕСТ! :)

Никола Јовановски - Учесник на RM Delft Autumn 2015

1. Кажи ни што претставува RМ Delft на кратко. Кои BEST локални групи беа дел од него и колку луѓе имаше вкупно?

-Regional Meeting Delft 2015 е интернационален настан кој се случуваше оваа есен (14.10 - 18.10) во холандскиот град Делфт, при што членовите се запознаваат подобро со функционирањето на BEST преку учествување на тренинг сесии за меки вештини.

Можат да учествуваат поискусни но и понови членови на BEST. Присуствуваат и тренери и кординатори од интернационалните тимови,регионалниот советник и претставник од интернационалниот борд. Но тука се и членовите од партнерската студенска организација BONDING, како и партиципанти кои се надвор од регионот, како на пример што бев јас. :)

Конкретно присуствуваа 9 локални BEST групи: Делфт, Брисел, Брисел УЛБ, Парис Супелек, Лиже, Торино, Рим,Нанси и Ерланген. Па така си запознав мноогу нови пријателчиња од овој северо-западе регион.

  

 2. Какви се сесии имаше и која беше твоја омилена?

-Меки вештини, case study за подобрување на Регионот и BEST, работилници од Интернационалните тимови и извештаи за тековните проекти.

Најомилена сесија ми беше работилницата од страна на ТиГро (Интернационалниот Тим за Тренирање) во која ни презентираа како се организира тренерски настан координиран од нивна страна.

3. Што очекуваше да научиш од сесиите и дали тоа се оствари?

-Очекував да дознаам и да бидам воведен повеќе во интернационалното работење на нашата организација и да присуствувам на тренинг за некои меки вештини кои не сум знаел дека постојат.

Моите очекувања се остварија тотално,еве ме си се вратив во Скопје со проширени хоризонти, многу знаење и огромна мотивација.

4. Покрај сесиите,дали имаше време да шетнеш и во градот?

-Да да секако, не шетавме само во центарот на Делфт, туку организаторите ни организираа и специјална посета на универзитетската зона на Техничкиот Универзитет, кој е всушност и еден од најдобрите политехнички универзитети во Европа. Како една од најинтересните активности би можел да го издвојам екстремното качување на карпи во специјализирана тренинг просторија.

Сите оние кои што се сте размислувале за учествување во ваков тип на настан - не двоумете се, ќе запознаете мноогу нови пријатели, прекрасни спомени а и неверојатно е со колку многу ново знаење ќе се здобиете.

 

Стефан Серафимоски - Летен состанок на finTeam

1. Твоето лето помина на малку поразличен начин. Раскажи ни нешто околу тоa- Токму така, моето лето помина малку поработно од вообичаено лето на какво сме навикнати, но сепак успеав да се забавувам и да запознаам нови места и нови култури. Наместо на одмор или летен курс бев на летен состанок на комитетот за корпоративни односи на интернационално ниво (SM finTeam) кој се случуваше од 16 до 25 август во Варшава.

2. Што се случуваше на тој настан?
- Се работеше за доста интересен настан, на кој ние, членовите на комитетот за корпоративни односи на БЕСТ, имавме тренинзи од областа која ја работиме, а воедно, заедно со менаџментот на комитетот, ги дефиниравме целите и плановите за претстојната година. Но сепак, освен тоа успевавме добро да се забавуваме и да ја запознаеме полската култура и храна преку одлично организирани забави, како на пример полската вечер, каде пробавме од најпознатите полски специјалитети и ги научивме нивните национални танци. На настанот имаше учесници од преку 12 различни европски држави, секоја со различен јазик и култура.

3. Што работи комитетот за корпоративни односи?
- Како што името кажува, ние во комитетот за корпоративни личности сме доста мотивирани студенти од цела Европа кои на интернационално ниво работиме на соработка со големите интернационални компании, како Deutsche Bahn, Dell, Whirpool и многу други. Тие ја поддржуваат организацијата финансиски и преку учество на големите интернационални настани кои ги организираме, како на пример BEST Career Day кој ќе се одржи на 1 април 2016. Воедно компаниите се активни корисници на нашиот интернационален центар за кариера, во кој свои податоци и апликации имаат оставено преку 37 000 студенти од преку 95 технички универзитети на ниво на цела Европа. Тоа е голем систем кој треба постојано да се одржува, па тука настапуваме ние, кои како мотивирани и тренирани студенти во таа област контактираме со компаниите преку повици, состаноци и онлајн конференции.

Сара Коцевска - фотограф на EBEC Final 2015

1. Кажи ни нешто на кратко за EBEC, каков настан претставува и кој се може да учествува.
-EBEC е инженерски натпревар наменет за студентите кои имаат можност да ги покажат своите вештини, својата креативност и досетливост. Овој натпревар е одлична забава, кретивност и шанса да се истакне натпреварувачкиот дух. Победниците на локалното ниво одат понатаму на регионално ниво, од кадешто имаат шанса да одат на крајното европско ниво. Како натпреварувачи може да учествуваат само членови кои не се во Локалната BEST група, додека како организатори пак само членовите. 


2. Подобјасни ни што вклучуваше твојата функција, и на кратко опиши ни еден ден.
-Оваа година EBEC Final се одржуваше во Порто, Португалија од 31ви јули до 14ти август. Имаше 120 партиципанти и околу 60тина организатори (на локално и интернационално ниво) Јас аплицирав и бев избрана за фотограф, па мојата задача беше да доловам уникатни моменти за да можат и оние кои не присуствувале да видат што се случува.
Како ни изгледаше еден ден? Најпрво, наутро станувавме околу 8 часот, а веќе во 9 почнувавме со извршување на своите задачи. Додека партиципантите ги спремаа своите говори и дискутираа за идеи, никој од организаторите не смееше да им пристапи во тој период , освен ние фотографите :P Имавме обезбедено доручек,ручек и вечера а се работеше се до 19 часот,вклучувајќи ги и паузите. Секоја вечер, ние организаторите имавме состанок каде дискутиравме за она што се поминало и што ни следува наредниот ден. По завршувањето, секако и се забавувавме.

3. Колку предзнаење ти беше потребно за оваа функција и колку научи по завршувањето на настанот?
-Предзнаење во полето на фотографија имав и од претходно меѓутоа таквата средина каде буквално во секоја секунда се случуваше нешто интересно ми дозволи да ги подобрам своите вештини уште повеќе. На некој начин, како доказ можеби е и есенскиот натпревар по фотографија, во категоријата ''BEST Engineering Competitions'' на кој го освоив првото место со фотка токму од таму. 

4. Каква ти беше соработката со тимот, но и со партиципантите?
-Работев во тим со уште 8 прекрасни луѓе кои за тие 15 дена ми станаа како фамилија. Имавме еден координатор, а конкретно во полето на фотографија бевме двајца. Заедно си помагавме неверојатно многу и навистина зачудувачки е колку научив за координацијата и работата во тим. Со партиципантите се дружевме многу и успеав да се запознаам со поголемиот дел од нив и тоа го гледам како еден огромен плус при присуство на ваков интернационален настан бидејќи создадов познанства и пријателства од секаде. Со некои и сеуште комуницирам секојдневно.

5. Каков однос имавте вие - организаторите и учесниците со компаниите?

-Јас,како и целиот Медиа тим бевме во постојан контакт со компаниите кои беа поддржувачи на настанот пред се поради промоцијата која како студентска организација им ја нудиме. Голем дел од учесниците добија и можност да имаат приватно интервју со компаниите како DELL, REPLY, DEUTSCHE BAHN, SAKTHI, COLQUIMICO. Затоа сите оние кои не сте членови на BEST ве охрабрувам да се пријавите најпрво на нашиот локален EBEC па да стигнете и вие до тука ;) 





За крај, стиснете ТУКА каде ќе може да ги видите фотографиите на официјалната facebook страна на EBEC. 
А ТУКА за да го погледнете видеото кое го изработивме како сумација од целиот настан.