Мотивациски Викенд Караџица - април 2015

Да се биде дел од тимот на БЕСТ е прекрасно чувство што е тешко да се долови со зборови. Енергијата која владее во организацијата зрачи и исполнува и со цел да се одржи ваквата енергија потребно е членовите добро да се познаваат меѓу себе и постојано да се мотивираат. За да се постигне ова редовно се организираат мотивациски викенди. Овој пат честа да бидеме главни организатори ја имавме токму ние, Стефи и Влатко.

Од 17-19 април се одржа уште еден, не помалку легендарен од претходните, мотивациски викенд во Караџица. Подготовките вклучуваа три неделно организирање на превоз, сместување, сесии и секако најдобри забави за луѓето кои почнуваш да ги гледаш и сакаш како најблиско семејство. Во текот на подготовките наидовме на препреки кои ништо не и можеа на нашата тимска работа и не нѐ спречија да успееме во нашата мисија да организираме вистински БЕСТовски, незаборавен викенд. Бидејќи оваа функција и за двајцата беше првото одговорно искуство во БЕСТ, помошта и поддршката која ја добивме од бордот и целото членство беше повеќе од добредојдена.

Трите дена во Караџица прелетаа брзо (исто како и патот до таму :P). Тоа се случува кога си опкружен со исклучително забавни, позитивни и мили луѓе. И иако не одеше сѐ според планот и ја имавме таа (не)среќа да ни снема струја, сепак си поминавме најубаво. Имаше смеење до солзи, се стекнаа нови пријателства (дури и интернационални бидејќи имавме гостин од Турција), се проширија нови трачеви, се уживаше во прекрасниот поглед од планинарскиот дом и се поднаучи информација повеќе за работата на БЕСТ.

Апсолутната среќа која ја чувствуваш во моментот кога ќе те изберат за главен организатор двојно се зголемува кога ќе добиеш позитивен фидбек од сите присутни на мотивацискиот викенд и ќе знаеш дека твојата работа придонела за кревање и одржување на БЕСТовскиот дух. Бевме присутни на еден мотивациски викенд за кој се погриживме уште долго да се зборува.

13ти роденден на БЕСТ Скопје

За повеќето март е месец на пролетта, но за нас БЕСТовци – март е месец за роденденска журка! По повод 13тиот роденден на БЕСТ, на 7ми март беше одржана најоткачената роденденска забава во Скопје (а можеби и пошироко), кога БЕСТ Скопје конечно стана тинејџер!
По исцрпни две недели поминати во подготовки и планирање, се журкавме во клуб Penguin на најсветски начин - со забава на тема Around the world! Нè имаше од секаде - Шпанија, Франција, Шкотска, Африка, Америка, Русија, Англија, Хаваи и многу други земји.

За нас, Main Organisers, организирањето на роденденот како прво и најинтересно искуство досега во БЕСТ можеме да кажеме: We had the time of our lives! Целиот процес на планирање се одвиваше во рок од 2 недели, ја одбравме темата на работната група каде присуствуваа околу 25 БЕСТовци полни со идеи. Таму назначивме одговорни за маркетинг, спонзорства и музиката. Ние заедно со нашето тимче си работевме, маркетинг ни направија совршен постер (кој што го забележавте горе на статијата), слаткарниците беа дарежливи и ни направија преубави торти, а беше пуштена и листа на мејл каде секој си придонесе со две-три хитчиња. Откако го најдовме најдоброто место за журката – Penguin Club, се потрудивме да посветиме многу внимание на деталите и украсите за да направиме ептен Around the world атмосфера.

Планирањето знаеше да ни одземе повеќе време, но сè тоа вредеше бидејќи крајниот резултат беше одличен! Имавме неколку стресни моменти – како на пример невозможната мисија да донесеме огромна табла од канцеларијата до клубот и назад – но, сега знаеме дека барем имаме навистина забавна приказна за раскажување.

На крај, доживеавме какво е задоволството да добиваш позитивен фидбек од сите кои што присуствуваа на забавата! Презадоволни сме од тоа како сè испадна, од гостите (коишто го испочитуваа дрес кодот) и од сите што ни помогнаа роденденот да го достигне својот највисок потенцијал! Едноставно така функционира БЕСТ Скопје како организација, а почитта и работата водат кон успех и најубави журки – тоа што нè привлече и на самиот почеток – пријатната атмосфера и амбициозен дух. Сите среќни и задоволни (6те торти ептен помогнаа во тоа) се изнажуркавме најмногу што можевме и навистина си поминавме најубаво на свет! ;)

Ве сакаат Јана и Мила!

Импресии на Сандра за Локалното Генерално Собрание на БЕСТ Скопје

Како поприлично нов член во светот на БЕСТ, кога прв пат слушнав за Локалното Генерално Собрание, имав една бледа слика во главата за тоа како би изгледало тоа. Не бев ни подготвена за она што го посведочив зошто беше толку далеку од мојата првична замисла, што немаше ни допирна точка. Тоа беше едно од најдобрите искуства досега во БЕСТ (се разбира после есенскиот курс).

Не само што стекнав огромно знаење во врска со БЕСТ и неговата работа, туку имав и шанса да посведочам едни за мене интимни моменти кои постарите членови од БЕСТ ги имаа едни со други. Немо гледав како од полноправни членови преминуваа во Алумни и добиваа ништо помалку од пофални зборови од останатите членови кои зборуваа со солзи во очите. Ја гледав и среќата во очите на младите членови додека полноправните ги редеа причините  зошто треба и тие да бидат изгласани за полноправни.

Ја имав и таа привилегија да го гледам мојот неофицијален анѓел како станува член на новиот борд кој во наредната година ќе се покаже како одличен тим. Ја чувствував таа блискост помеѓу членовите и сфатив колку секоја индивидуа го прави БЕСТ тоа што е-семејство. Како млад член имав и јас шанса да учествувам во генералното собрание, и иако требаше да ги делам ливчињата за гласање, да ги соберам и да ги прочитам истите, се чувствував како да ја имам најважната работа на светот и се чувствував гордо додека ја извршував.

На ова собрание, после долги 12 часа-кои вредеа да бидат преседени- ја добив мотивацијата да дадам се од себе за БЕСТ и максимално да пробам да се вклучам во работата за и јас еден ден, на некое наредно собрание да ги споделам тие интимни моменти на кои сега бев само observer.

by Сандра Ивановска

Како си помина делегацијата на ЛБГ Скопје во Хања, Грција

Делегацијата на ЛБГ Скопје која се состоеше од 6 луѓе, беше подготвена да тргне на уште една авантура позната како Регионален БЕСТ состанок во Хања на островот Крит во Грција.

Регионален БЕСТ состанок е интерен настан на организацијата на кој се собираат околу 80 студенти од цела Европа кои во четиридневна програма составена од case study, workshops и discussion groups, учат повеќе за БЕСТ како организација и работат за да ја усовршат истата како и да ја направат попристапна за студентите од цела Европа.

Кога пристигнавме во Хања имавме доста топол пречек од организаторите. Самите организатори се студенти како и сите нас, па заедно бевме доста возбудени за самиот настан и подготвени да имаме уште едно незаборавно искуство исполнето со работа и забава.

Хотелот во кој бевме сместени беше навистина прекрасен. Беше веднаш до морето, а сите наши соби имаа поглед кон прекарсното Егејско море. Времето навистина ни се погоди. Никогаш не сум пливала во море во месец април, па овој настан го искористив дури и за едно вакво искуство.

Целиот распоред исполнет во тие четири дена. Преку ден работевме и учевме за БЕСТ, додека пак вечерта ја корстевме за дружба и за подобро запознавање. Уште еден настан во БЕСТ може само повеќе да те надогради. Бев навистина среќна што запознав многу нови лица, а покрај нив сретнав и некои што веќе ги познавам. Светот на БЕСТ е навистина мал. Порано или подоцна доколку често патувате ќе ги сретнувате вашите другари и другарки или пак ќе се запознавате со некои што веќе ги познаваат.

На секоја активност во текот на денот на Регионалниот состанок ние како делегати на ЛБГ Скопје навистина уживавме. Имавме слобода да одбереме на која презентација или тренинг сакаме да присуствуваме. Тренинзите беа реализирани од веќе поискусни Бестовци, кои покрај тоа што не учеа како поефикасно да работиме во БЕСТ, не учеа и како да се надоградуваме себе си и како да бидеме поодговорни во работите кои ги правиме.

Забавите беа навистина незаборавни. Дружба имаше и во текот на денот и во текот на ноќта. Дури и да си легневме доцна, иако утрото требаше да станеме во 8 часот, сепак не ни пречеше тоа, бидејќи сакавме што подолго да останаме будни за да имаме што е можно поубави и полуди моменти од ова патување.

Иако курсевите се настани кои топло ги препорачувам на секој студент, сепак и вакви интерни настани треба да се посетат. Целта на вакви настани не е само да учите и работите за БЕСТ, туку и можност да се надоградувате како личности кои подоцна ќе бидат поодговорни, а воедно и побогати со поголема бројка на пријатели ширум Европа. 

Александра Крстевска

Првиот мотивациски викенд на Катерина со БЕСТ!!

Доколку сакате мала промена во  вашето секојдневие, мојот совет дефинитивно е мотивацискиот викенд. Едноставно сакав малку да се  одалечам од Скопје, да дознаам нови работи и запознавам нови луѓе. На еден од состаноците на БЕСТ се спомна мотивацискиот викенд кој го организираат, сите кажуваа само добри зборови, па тоа ме копкаше и јас да се пријавам. Морам да признаам дека се што кажуваа, се беше вистина. Почнувајќи од 2та километри кои требаше пешки да се одат, убавиот камин, тренинг сесии од кои има што да се научи, па се до ноќните журки, интересните игри и убавата дружба со сите присутни таму.  

Иако траеше само 3 дена, кога се вратив имав чувство како да било многу подолго. По самото пристигнување во петокот почнавме со игри за запознавање меѓусебе што стварно помогнаа, затоа што поголем број од присутните не ги знаев. Ги имавме тренинг сесиите, кои ми помогнаа да го зголемам моето знаење, како за БЕСТ Скопје, така и за БЕСТ како организација на интернационално ниво. 

Иии најзабавниот дел, ноќните журки кои беа супер организирани, верувам дека сите имаат убави спомени од нив, а од мене доволно е да кажам дека имав недостаток од сон и се тоа затоа што не сакав да легнам за случајно да не испуштам нешто. Овој викенд стварно беше мотивација за продолжување со активностите во БЕСТ и дефинитивно ќе ми остане во сеќавање. J

Катерина Михаилова

Спортувај со БЕСТ

ден 1. Лизгалиште 21.01.2014

Не знам дали интуитивно ја направивме одлуката (беше изгласано од страна на мнозинството нели..) но дефинитивно го поканивме снегот оваа година, т.е ја отворивме сезоната 2014 на лизгалиште во салата “Борис Трајковски”. Снегот и не се задржа многу...едвај и падна во Скопје, но следните првенци во уметничко лизгање дефинитивно се покажаа на “подиумот”.

По завршувањето на добро познатиот состанок во вторник, Бестовци се упатија кон посакуваната дестинација полни со ентузијазам и желни за “break a leg” на лед – не во буквална смисла секако...:) Имаше спортисти од сами почетници до професионалци, аматери, пензионери, заљубени и изгубени....и од оние што ги фати страв кога го видоа ледот, па немаа друг избор освен да бидат жири за вечерта и да се грижат за непотребните јакни (кога сите беа толку загреани). Јас, Јасмина и Симона чекавме да се појават хероите..надгледувавме, па затоа добро се сеќавам дека меѓу првите кои што покажаа храброст беа оние со малку повеќе искуство-или како што кажаа, искуство со возење ролерки кое и те како влијае на умешноста со лизгалките-браво за Тамара и Лабро! Понатаму следеа Кристина и Тихе кои рака под рака, полека но сигурно го ставија мразот под нозе и под контрола. Ии ги забележаав и Нате, Кики, Александра и Весна кои како вистински ајс-дами без двоумење си лизгааа, ама и понекогаш се лизнаа...додека веднаш позади нив машкото друштво составено од Алтај, Диме, Дамјан, Никола и Александар се трудеше да ги покаже своите способности, правејќи некои остри вртења, превртувања па и евентуално паѓања..:P А секакоо на почетокот Бојана и Борче си ги имаа најдобрите другарчиња што може да се најдат во ваква ситуација-деловните лизгачки поларни мечиња кои беа спас! That was one hell of an ICE PARTY.

За крај еден поздрав до сите со песната: http://www.youtube.com/watch?v=TNrtWwyY1kM и тие што го пропуштија ова дружење мора да ни се придружат следна прилика! Или самите нека си размислат што пропуштиле.

Тамара се одјавува! J

Тамара Трајковска

Верификационо собрание, 25 јануари 2014

Саботата (25 јануари) беше еден од најважните денови за БЕСТ Скопје и нејзините членови. Тогаш се одржа Верификационо собрание каде што се донесоа важни одлуки за иднината на организацијата, а најважната беше верификувањето на новиот 13-ти борд кој брои 7 членови.

Собранието почна со претставување на Дневен ред од страна на искусен член на БЕСТ Скопје, а веќе алумни, Јасенка. На собранието присуствуваа млади членови, искусни членови, како и алумни. На ова собрание секој член имаше можност да види одблиску каква е внатрешната работа и организација на БЕСТ Скопје, колку се сериозни и способни студентите да водат една ваква организација и како всушнст функционира БЕСТ Скопје.

Имаше доста смеење, сериозност, но и по некоја солза,бидејќи на ваквите собранија најчесто се одлучува дека некои искусни членови, по нивната долга и продуктивна работа треба да станат алумни, по нивно барање. Покрај солзите, имаше и смеење и честитки, бидејќи, како што некои стануваат алумни, така други млади членови стануваат полноправни и добиваат поголема доверба од БЕСТ Скопје, како и можност да придонесат многу повеќе во самата организација. Така, се случи две искусни членки да станат алумни, а четворица млади членови, по напорната работа добија можност да станат полноправни. 

Еден од најважните делови на ова Верификационо собрание беше презентирање на работата на пертходниот борд во БЕСТ Скопје, кој имаше мандат од година дена. Овој борд кој исто така брои 7 членови, презентираше колку и какви настани има организирано БЕСТ Скопје за време на нивниот мандат, колку се зголемила бројката на членови за време на нивниот мандат, колку се зголемила бројката на нови фирми со кои соработува БЕСТ Скопје и уште многу други работи, важни за напредокот и развојот на организацијата и нејзините членови.

На крај дојде и важниот дел од ова Верификационо собрание, каде што сите полноправни членови едногласно го верифицираа новиот 13-ти борд во БЕСТ Скопје, чии членови беа одбрани на Собранието одржано во септември. Покрај бордот, беше одбран и нв Вивалди одговорен, лице во БЕСТ Скопје кое ќе се среќава со сите оние желни студенти за патување кои аплицирале на сезонските курсеви организирани од БЕСТ низ цела Европа и ќе биде тука секогаш да им објасни дека БЕСТ го нуди само најдоброто за нив.

Александра Крстевска